劉千石為「鄧麗君」改名千千

(http://www.epochtimes.com)

【大紀元7月25日訊】立法會議員劉千石因為鄧麗君，竟從此改掉政界的稱號「阿石」，改名「千千」。取而代之就係早餐派的石禮謙，因人如一舊結結實實的石頭，早餐派兄弟都叫他「大舊石」，江湖就從此少了一舊「阿石」，多了一舊「大舊石」！

早餐派昨晚反傳統，唔用食早餐溝通，改為晚間出動，包埋生銀行頂樓個Club同記者唱K聯誼，大家都好盡興，議員揀歌多數係七十年代的GoldenOldies，記者當然揀至In新歌，出現了代溝，幸好有《朋友》、《紅日》等勵志歌拉近彼此的距離。

據東方日報7月25日報導﹐席間，吳亮星「星爺」大爆劉千石因為鄧麗君，被改名做「千千」的故事。話說獅子會最近舉行了一個活動，邀請了各省市至叻模仿鄧麗君的人表演，其中一名「鄧麗君」當日全程拉住劉千石，由頭到尾都叫阿石做「千千千千」，成日加埋可能叫了成億次，搞到阿石頭都暈埋，星爺當日原來一一看在眼內，記在心內，從此就叫阿石做「千千」。

講開早餐派，大舊石昨日講了派中一個秘密俾卓妮知，佢話平時在立法會投票，派中兄弟都以一名議員作為賭具，大家都會打賭，估下佢會開大定開細，即係投反對票定贊成票，點知在最近一次的投票時，佢竟然開出圍骰，搞到成地眼鏡，結果派中從此加多一項玩法，就係可以估埋開圍骰。至於佢係邊個，就無人肯講，但在座者包括卓妮都估到係阿Baby李先生啦，大舊石仲笑而不語，就令答案更加肯定！(http://www.dajiyuan.com)