site logo: www.epochtimes.com

出外靠朋友 — 英国各地港人专访

人气: 1119
【字号】    
   标签: tags: ,

【大纪元2022年01月04日讯】自LOTR同BNO visa慨出现,英国各城市陆续都出现好多香港人,意味住移民英国慨路途上,您绝对唔系孤单一人。相信对于唔太熟悉英国各城市慨香港人,喺边个城市落脚都系问题之一。根据港侨会慨“港人移英热门地点分析报告”,香港人会因为工作机会而拣喺Greater London定居同发展,当然咁大个国家选择就唔系得一个,London以外慨城市都可能适合您。以下我哋好高兴访问到分别住喺Essex、Nottinghamshire、Birmingham 同埋 Swanseas慨香港人,睇吓佢哋定居喺当地慨原因同埋喺英国生活又有咩贴士。

城市:Ingatestone

受访者:Page,居英50年

Page喺70年代就跟屋企人移民过嚟英国,先后因为工作原因喺Central London同Essex入面几个城市居住过,最后就拣左喺Ingatestone附近定居。Ingatestone介乎于Greater London同Essex 2个郡之间,所以要入Central London都好快,火车转地铁大概系1个钟到。Ingatestone呢面多数都系住house同flat,2至3房单位楼价大概系40万英磅,1房慨单位就大概系25万英磅。佢觉得呢区比较适合一家大细或者退休人士嚟住。

地区/环境:

如果大家想知多啲当区慨治安同埋罪案率,可以上police.uk同埋adt.co.uk 查吓自己嗰区。

以下呢几个区都值得推介:

1. Ingatestone:

一个村庄,比较静同埋相对地闷,但系好悠闲,出入London做嘢都会方便啲。

2. Chelmsford:

一个相对大慨城市,市中心比较大,工作机会比较多。

要小心慨地区有:

1. Dagenham & Barking(Greater London):

虽然楼价好平,但系呢区好杂,呢度成日有人打交、抢嘢同埋爆窃。

2. Basildon (Essex):

呢区好多Council Houses,住慨人都系比较杂,校网亦都好差!
关于升学:

呢面天主教学校慨校风会好啲,如果家庭本身已经系教徒不妨可以去当区慨教会联谊下,亦都可以请教会入面慨神父做小朋友慨推荐人,会更加容易入到天主教慨学校。

另外Essex呢面都有几间唔错慨Grammar School(政府经营慨名校,专门俾小学成绩好好慨学生读),例如:Colchester County High School for Girls 系一间英国排名数一数二慨Grammar School。想考入去就要先考11+ Exam (Grammar School慨入学试),通常家长可以喺小朋友8、9岁慨时候帮佢地揾定专门教11+ Exam慨补习老师,上Gumtree.com 就可以揾到好多唔同慨补习老师。

入乡随俗:

尽量互相尊重,同埋融入呢度慨文化,俾一个好慨印象英国人。当然喺呢到人生路不熟都要警觉性高啲,小心俾人呃。

例如呢区始终系一个村落,入面有时都会有马车行,如果揸车时前面有马车千祈唔好冇预警咁超车,因为咁样会吓到只马,好容易出意外。

又例如买屋慨时候要留意层楼系唔系grade 1/2 listed (历史建筑),如果系慨话间屋唔可以乱咁改装,查到慨话会俾人罚钱。

过来人慨贴士

建议如果想快啲融入社区,有小朋友慨家庭可以喺local council入面睇吓有冇啲Mother’s Club可以参与下,佢哋有时都会有啲联谊活动,家长可以互相交流下,小朋友又可以同其他小朋友一齐玩。

当然如果想学好啲英文都可以喺local college揾一啲English as a second or foreign language(ESOL)或者其他兴趣班同人交流吓,通常喺Local council同library都有呢啲班慨海报广告,任何年龄人士都欢迎去报。

城市:Mansfield

受访者:Andy,一家三口居英7个月

Andy一到埗已经喺Nottinghamshire买屋,但因为当时仲未收到楼所以喺Stafford同Derby租Airbnb住过一排,顺便了解吓当区慨环境。Andy拣喺Nottinghamshire落脚系因为佢比较向往自然生态环境慨生活,区内附近有森林、郊野公园,空气相对都比较清新。

生活:

Nottingham慨市中心会比较多华人超级市场、唐餐馆同埋附近慨小镇都有好多大型超市,非常方便。区内最近都多咗好多香港人,我住紧嗰到都识咗几个香港嚟慨邻居。住喺区内可以搭电车代步,但因为我住喺Mansfield所以揸车去市中心大概要20分钟。如果想知更多呢区慨嘢,建议可以上Local Council慨官方网站了解。

工作机会:

呢区有几个大型warehouse长期都会有招聘唔同部门慨职位, 如果未揾到心仪慨工可以做住先。有好多其他欧洲国家慨移民人士都喺warehouse打工,而英语水平同埋工作效率都系我哋香港人慨优势,只要肯放下身段,当骑牛揾马储吓喺英国慨工作经验,揾到工绝对唔难。

当然Nottingham都有一个好似中环咁样慨down town,白领人士都会有唔少工作机会;如果想创业慨话其实呢面几流行加盟店慨生意,变相Franchiser会提供资源同埋数据,咁开业时就唔需要由零做起。

校网:

Nottinghamshire系一个校网比较大同Outstanding学校相对地多慨地区。

考虑到仔仔慨学业,我地就喺到帮佢报咗间Outstanding慨State school。如果想知道区内学校慨评级,可以喺https://www.gov.uk/school-performance-tables 查询,评级系由校内学生成绩而定。因为英国冇得跨区拣学校,所以揾地方落脚要考虑埋当区校网!

过来人慨贴士

我慨建议系买楼千祈唔好隔山买牛,一定要做足功课,尤其系喺英国买楼慨程序比香港复杂,所以唔好懒同心急。移民慨心态上,建议香港人唔好自我封闭,多啲主动参与社区活动、同本地人多接触、沟通。出去返工、返学可以更容易融入英国生活。尽量唔好带住香港慨生活习惯过嚟,虚心学习本地人慨文化、处事方式、尊重唔同阶层同种族、奉公守法,贡献社会,令到本地人都知道香港人慨质素!

城市:Birmingham

受访者:Randi,居英10年以上

Randi喺10年前因为小朋友嚟Birmingham读书慨关系就一直喺度住咗10年以上。

Birmingham系全英国第二大慨城市,呢到聚集咗好多唔同文化同宗教背景慨人,亦都有好多回教寺。近年呢到都逐渐变成一个商业化慨地区,打造紧一个金融中心,几年前HSBC总行都搬咗上嚟,变相呢到多咗好多生活配套又多咗就业机会。

生活:

之前我住喺Merry Hill附近,出返市中心揸车都要差唔多半个钟,呢区白人比较多就比较静。 Birmingham City University附近有好多新慨楼盘同商店,繁荣到好似第二个City Centre咁。China Town最近就开咗好多唔同慨中式食肆、珍珠奶茶铺同埋华人超级市场,附近亦都有一个大型室内街市同埋其他印巴超级市场,有时喺嗰到买菜平过中超好多。最近附近慨B5地区拆咗个Wholesale Market,开始起紧好多flat同apartment,香港人都可以睇下呢区慨楼盘,因为都好方便。

房屋:

呢面慨住宅区大多数系以Semi-detached house为主,就算有Apartment都只系得三层,之前住过慨2房单位楼价大概系20万英磅有找;宜家喺City Centre住一个2房单位要差唔多23万英磅。如果租近市中心慨Studio flat或者系1房单位每个月大概系650-700英磅,2房就1000-1200英磅到。

工作机会:

呢到比较多银行同埋金融工种,NHS同埋学校都等住请人。其实如果香港人唔介意转行做劳动工种,呢度慨超级市场同埋商店都长期需要请仓务或者售货员。如果英文沟通能力好其实可以试下做售货员,人工都几好。以我朋友喺Chanel做Sales为例,最主要sell中国客同埋留学生,佢一个月扣税后慨人工都有3000英磅到。

校网:

确定喺边区住之前,首先email问咗嗰区慨学校有冇位,如果唔系到时搬到去睇到另一个区啱慨学校,系唔可以跨区升学,但都可以喺Local Council申请等佢派学校。 如果就小朋友嚟读中、小学慨我会推介以下呢几个地区:

Selly Oak, Edgbaston, Harborne, Sutton Coldfield, Bournville

过来人慨贴士

 推介慨地区:

Selly Oak同Edgbaston

相对地会近市中心,大概系15-20分钟车程,呢2个区慨楼价唔算太高,所以都有好多华人系呢到住。

要小心慨地区:Soho同Handsworth

呢啲地区都比较多印巴人士,睇落会比较杂同乱啲,治安亦都麻麻地。

城市:Swansea

受访者:Freddie,居英3年

Freddie因为5年前嚟Swansea读Master,之后为左工作选择一个人移民过嚟Swansea定居。佢话如果要用一个香港地方去形容Swansea,西贡就最贴切。Swansea系一个沿海慨城市,有小小新市镇慨感觉亦都有好多绿化空间,系一个好悠闲慨地方。闲时Freddie钟意沿住海边由市中心行去The Mumbles,佢话沿途都有几多公园值得行吓,例如Clyde Garden、Singleton Park都唔错。

住屋:

Swansea市中心慨一房单位租金大约系一个月600英磅楼下,要睇吓合约有冇包bills同Wi-Fi;如果唔介意租Share house慨话价钱大约系400几英磅一个月,不过Share house就要同人共用厨房、客厅、厕所,居住环境好与越都好睇同屋主系点慨人。如果系自己一个嚟慨年青人又唔介意住Share house,以下呢几个地点可以睇下:

Uplands同Brymill有好多唔错慨Share house,嗰到相对地会多啲大学生租;Strand有一个好大慨Student accommodation building,如果系学生慨话可以租Saint David’s;Marina就会比较多华人学生租住,亦都好近海边。

如果想拣比较好慨地区,可以睇吓Sketty、Killay (Uplands) 同埋The Mumbles (Post Code: SA3),佢地系比较有钱啲慨地方。有小朋友慨家庭可以考虑吓Sketty呢个地方,因为佢慨校网好,附近有一间全威尔斯排头几名慨中小学––Olchfa School。

当然咁大个城市都有一啲冇咁好慨地区,我唔会建议香港人拣喺Mayhill、

Townhill同埋Mount Pleasant呢啲地方住,呢啲都系治安冇咁好慨地方。呢几个地区起咗好多Council house (公屋),人流比较复杂,住慨人多数都系拎紧统一福利金俾市政府安排入去住慨低下阶层。而正正因为呢度品流复杂,经常发生劫案,治安问题严重,楼价都相对地低。所以千祈唔好俾佢慨价钱吸引到而拣喺呢区定居。

工作机会:

可能因为英国脱欧之后劳动阶层少咗批欧洲人去做,所以变相市场对蓝领工作慨需求比较大,例如做工程或者仓务都好快就会揾到工!另外Wales政府有推出学徒计划,过程中雇主会提供唔同慨蓝领工作机会,例如水电工、工程助理,完成咗个课程仲会俾到一个资历架构2-3级证书,当然呢个计划都冇年龄限制,如果唔怕转行慨香港人其实可以学返门技能旁身。想留意吓有咩学徒计划招聘紧人,可以去Careers Wales, https://careerswales.gov.wales/ 输入返地址或者Post code就会有揾到附近提供培训慨雇主。另外当然大家都可以喺呢个网站揾到一啲求职资讯,例如履历表同埋求职信慨格式,符合返呢面揾工慨要求。

当然都好睇移民过嚟慨香港人揾工慨态度,要有心理准备做唔返老本行或者要由头爬起,但系我觉得可以揾到咩工都试吓做住先,喺度建立多啲人际关系,到时想转工都有人可以帮你做推荐人。

华人社区:

想买亚洲食品、日用品慨地方可以去Sandfields一带同埋St. Helen’s Road到Bryn-y-mor Road,嗰度都有唔少亚洲人同埋以前移民过嚟慨香港人开慨商店同食肆。

呢到以前有一个机构叫做史云斯华人社区互助中心已经喺度差唔多20年,后来由威尔斯华人协会接手,佢地喺区内主要为华人提供专业服务,佢哋都会提供到广东话同国语慨服务,方便英文冇咁好慨华人去揾佢哋帮手。

过来人慨贴士

香港人嚟到Wales尽量试吓放低小小香港慨生活习惯,融入社区同呢度慨人接触,甚至可以学吓威尔斯语同本地人互相交流吓文化。大家可以喺www.fancharity.org揾吓一啲peer group或者兴趣班同多啲当地人倾计,我觉得呢个系一个好好慨机会去练英文口语能力,好多时英文口音真系唔重要,最紧要肯讲、凡事虚心学习同埋有礼貌,当地人都会有耐性教你。

责任编辑:陈彬

评论