(https://www.epochtimes.com)
【大紀元4月30日訊】運輸署計畫模仿西方先進國家，引入一套新車檢定制度，用測試車輛能源、撞擊、防盜等各項標準！
運輸署究竟知唔知，好多，西方先進國家行得通，例如議會民主、直選國家元首、人權平等，但，亞洲就未必行得通，因為國情、民情都唔同？
車輛測試，咪又係一樣！首先係外國地理環境，例如，北美洲同歐洲，都好多平原，邊車，設計、性能、構造，都係為平原而設！
而特區呢？就唔同！例如港島、新界，就好多山！架車上落花園道、干德道、大帽山、飛鵝山呀咁，條路又斜又窄，咁你引入一套歐美日本驗車標準，當正人西方國家一套就係晒、冇錯，又會唔會表錯情、
搭錯線，兼搞到特區車，由於亂咁驗，架架唔合格，就算合格，由於適應唔到香港道路，變完全唔Key？
仲有，人北美洲同歐洲，氣候亦唔同！四季分明，風光如畫，冬天多雪，春天乾爽，夏天晴朗，秋天又氣爽，唔似得香港，一年四季，日日沙塵滿天，又潮濕，灰濛濛一片，一架歐洲靚車處落地，冇幾耐，架車都會滿身塵埃，適應唔到香港潮濕天氣，唔襟擺，你用套適合西方先進國家氣候標準驗，咁咪仲死得人多？
連大笨象，都分為亞洲象及非洲象兩種！亞洲象係細隻，象牙短，對耳仔細，品性馴；而非洲象，則對象牙又長又彎，對耳大好多，兼品性兇暴，同樣係大笨象，根本係兩種脾性，又點可以撈埋講？
所以話運輸署咁樣係亂！不過，三年零十個月以來，成個特區政府瓣瓣都亂喇！都慣咯！個政府冇靈魂，唔犯錯先至係大新聞呀！
(https://www.dajiyuan.com)
